محمد هنيدي يوجه رسالة لجمهوره "صاحبو أولادكم"
تحدث الفنان محمد هنيدي خلال لقائه مع الإعلامي أنس بوخش، في برنامج ABtalks، عن حياته الشخصية ووجه رساله لجمهوره.
قال الفنان محمد هنيدي عن دور زوجته في حياته: "دورها كبير أوي أوي في حياتي، أولا عرفنا بعض وأنا لسه بقول بسم الله، هيا من أول المشوار خالص".
وتابع: "وكان في اتفاق بيني وبينها قولتلها لو أنا تميت 35 سنة ومبقتش حاجه الحمدلله يعني أنا هسافر، وعلى 33 جه صعيدي في الجامعة وبعده على طول اتجوزنا، وكنا أصدقاء أصلا، والأحلى في الموضوع إن علاقتنا بدأت صداقة”.
و أضاف: “الحب أرقي وأحلى احساس ربنا خلقه، الحب يعدي أي حاجة ويعمل أي حاجة، يعني لو بشتغل معاك وانت مديري و طلبت مني حاجه هعملها عشان انت مديري، لكن لو بحبك الموضوع هيختلف، الحب أطهر وأنقى احساس في التاريخ”.
“رسالة محمد هنيدي لجمهوره ”
ووجه محمد هنيدي رسالة لجمهوره قائلا: “صاحبو أولادكم من بداية المراهقة، يعني أنا كنت بحكي لأولادي في سن هتعدو عليه مواصفاته كذا و كذا، أنا جايلكو من المستقبل، لما بيعدو بيه بيقتنعو، بعد كده صاحبهم لازم يتصاحبو”.
و تابع: “ومنستغلش الصحبه لا خليك صاحب، بعد كدة يبقوا اخواتنا بقا، صاحبوهم صاحبوهم بكل الطرق لأن هما غلابة، احنا زمان كنا نترمي في الحارة كل جيرانا أبهاتنا ، تدخل هنا تتغدا، دا يعلمك صح من غلط، لكن دلوقتي هما جايين في وقت فعلا صعب، 100 ألف رأي،مين هيقعد معاهم بدل ما تقعد مع صحابك 4 ساعات خليهم 2، إلى جانب انهم مسؤلية هتتسأل عليها، وهي فيها متعة".
و رد هنيدي على سؤال لو هتعلم كل طفل في العالم حاجه واحدة ما هي: “ الصلاة، لأن علاقته بربنا هي اللي هتحميه، لأن هي الصلة بينا وبين رب العالمين”.