خالد الصاوي: “عشت أصعب 4 ساعات في حياتي وكنت على وشك مفارقة الحياة”

كشف الفنان خالد الصاوي كواليس أصعب 4 ساعات في حياته، حيث كان على وشك مفارقة الحياة، وتحدث عن شعوره من فترة للأخرى بالاكتئاب، وعن أساليب خروجه من هذا الشعور.

وقال خالد الصاوي ضمن تصريحاته مع أنس بوخش، في برنامجه “AB talk”: “في فترة معينة، أخدني العالم البديل من العالم الحقيقي، أخذتني الممنوعات أكثر مما ينبغي”.

وتابع: “في مرة من المرات، فجأة قلبي كأنه يقفز خارج صدري، بطريقة كأني هموت حالًا، ومشكلتي الكبيرة إني مكنتش عايز أموت على فضيحة، ودخلت بالعافية على السرير، وفضلت 4 ساعات في السرير، قلبي مش بيهدأ، ولا هموت على السلم، ولا هنزل مستشفيات، ولا هكلم حد، ولجأت لربنا وقتها”.

وأضاف: “وقولتله سبحانك انجدني وأنا هغير حياتي، وغفوت 4 دقائق مكملتش 5، وقومت كأني نائم 8 ساعات، وفيه اتجاه جوايا إني أقوم، ولميت الحاجة كلها، وحرقت حاجات، ورميت الباقي، وصليت ونمت شوية صغيرة وقمت لعبت رياضة”.

و استكمل: “ومجتش جنب الحاجات اللي بتفكرني بالحاجات دي كلها لمدة طويلة، ودا كان أسوء لحظة ليا، كل حاجة كانت بايظة، والحقيقة إن أنا نفسي كنت السبب الأول واللي بدأت الخطأ، وأهم حاجة إن الشخص يواجه نفسه ويعترف بأخطائه، وأنا قاصد أكشف عن أخطائي عشان أحذر اللي بعدي”.

وأردف: “اكتئابي عنيف، وبفضل مكتئب 3 أيام، وأنا بكره الاكتئاب وبحاول دائمًا مقعدتش فيه كتير”.

و استطرد: “طريقتي إني أطلع من الاكتئاب هو الكتابة، وفكر نفسي بالمواقف الرجولية، وأقابل ناس، وأنا أميل للوحدة، وأبدأ أشوف صحابي اللُطاف الصافيين، وأبعد عن الأجواء اللي فيها شُرب ، وأروح الجيم، مع البوكسينج والسباحة، أبدأ أحس إن ثقتي في نفسي رجعت، واتفرج على حاجات بحبها، وخرجت من الاكتئاب بعد كدا بالـAI، وفضلت أقرأ عنه”.