خالد الصاوي: “أول مرة قولت لنفسي أنا ممثل جامد بعد فيلم عمارة يعقوبيان”
حل الفنان خالد الصاوي ضيفا على برنامج “AB talks”، الذي يقدمه الإعلامي الإماراتي أنس بوخش، وكشف أسرار عن حياته الشخصية، ورحلته كفنان.
و كيف لم يؤمن بموهبته التمثيلية إلا في سن 45، وحبة العميق لأهله، وعن زواجه المتاخر بعد مقابلة الشخص المناسب.
“أبرز تصريحات خالد الصاوي”
وقال خالد الصاوي في تصريحاته: “أنا فنان مجنون بمعنى خارج الحسابات اللي بتتحط ممكن تقول عليها حرية أو فوضى أو تمرد، مبقدرش أخد الحاجة على علتها وده بيعملي مشاكل كتير مبعرفش أجامل أو مبعرفش أكل لقمة مش عايزها لو واحد حلف عليا الطلاق لـ تأكل هقوله طلق”.
وأضاف: “أنا متأكد إني فنان لأني شكيت في نفسي وموهبتي كتير.. أنا بكتب وخدت أول جوايز ليا عن الكتابة ثم بعد كده جه التمثيل، وكان التمثيل مشكلة لأنه خد وقت معايا وأنا كنت عنيد.. أول مرة قولت لنفسي أنا ممثل جامد أو أنا ممثل كويس بعد فيلم “عمارة يعقوبيان” ، وكان عندي 45 سنة وقتها و قبل كده كنت بقول أنا بحب التمثيل بس التمثيل مش بيحبني ليه”.
و تابع حديثه عن زواجه المتأخر قائلا: “أنا اتجوزت متأخر عشان قابلت الست اللي كنت مستنيها، وخطبت قبلها 3 مرات كل خطوبة شهرين تلاتة”.
و أكمل: “أنا مش مريح شوية، وعايز أقعد لوحدي وأعرف أستمتع لوحدي، وده في المعيشة المشتركة مش صح، ومراتي أحسن ست في العالم بالنسبالي”.
وأردف: “مي مراتي هي بنتي وأمي الصغيرة أحيانا، وهي شخصية نادرة كأنها خالد معدل على نضيف”.
و اختتم عن كيف استمر زواجهما لمدة 12 سنة قائلا: “مراتي قامت بالجهد الأكبر في الحفاظ على البيت، والأمان والسكينة اللي حصلت كانت بسببها، رغم إن فرق السن حوالي 20 سنة”.