أكرم حسني يحكي كواليس كتابة “تيجي نسيب” لأنغام: اتكتبت واتلحنت في 5 ساعات
كشف الفنان أكرم حسني، لأول مرة، عن كواليس كتابة أغنية “تيجي نسيب” للمطربة أنغام، في منشور طريف على “إنستجرام” ضم قصة مفصلة ومضحكة.
حيث نشر أكرم حسني مقطعًا للملحن إيهاب عبدالواحد وهو يعزف على الجيتار ويغني “تيجي نسيب” ويسجلها على هاتفه المحمول، وعلّق أكرم على الفيديو قائلًا: “قام إيهاب عبدالواحد عشان يمشي بعد سهرة طويلة عندي في البيت إيهاب مسابش فيها الجيتار من إيده هو بيغني وكلنا بنغني معاه”.
وتابع: “بعد ما كله مشي جاتلي فكرة أغنية “تيجي نسيب” ف كتبتها وخلصتها على الساعة ستة الصبح، وهموت وأكلم إيهاب عشان يجيلي يسمعها ويلحنها بس مكسوف أكلمه.. الراجل لسه ماشي من عندي من ساعتين، وأكيد ملحقش ينام. الساعة سبعة صباحًا، بعد ما قدرت امسك نفسي لمدة ساعة كاملة اتصلت بيه ف رد بصوت غرقان في النوم”.
وجرى الحوار بين أكرم حسني وإيهاب عبدالواحد كما يلي:
أكرم: صباح الفل يا بوب.. صحيت؟ (سؤال فيه كمية استهبال مش طبيعية)
إيهاب: لا لسه.. أنا نايم من ساعتين بس.. في حاجة؟
أكرم: لا يا حبيبي مفيش.. خلاص اصحى وكلمني
الساعة سبعة وربع اتصلت تاني..
أكرم: إيه يا بوب.. صحيت؟
إيهاب (بعصبية مكتومة قدرت أحسها): أكرم أنت كويس؟
أكرم: آه يا معلم تمام، بس أصلي كتبت حاجة كده وحاسس انها حلوة ف عايز أسمعهالك.
إيهاب (بحماس): لا إن كان كده هفوق والبس واجيلك
أكرم: يالا مستنيك
الساعة سبعة ونص اتصلت بيه
أكرم : بوب قهوتك ايه ؟
إيهاب (بعصبية): أكرم.. والله العظيم بفوق وهاجي
أكرم: ماشي يا حبيبي مستنيك
الساعة تسعة إيهاب وصل
أكرم: بوب أنا كتبت أغنية فرحان بيها أوي
إيهاب: طب مش كنت تسألني قهوتي إيه؟
أكرم (بتجاهل): بص يا بوب الأغنية بتقول “تيجي نسيب.. تيجي نجيبها في النصيب.. تيجي نقول محناش لبعض ويبقي بعد تغيب واغيب …………”.
إيهاب (باندهاش): مين اللي كاتب الكلام ده؟
أكرم: أنا
إيهاب (بنفس حالة الاندهاش): أنا قهوتي سادة
أكرم : حالًا
وتابع أكرم: “من الساعة تسعة للساعة اتناشر إيهاب مبيعملش حاجة غير انه ماسك الجيتار وعمال يجرّب جمل لحنية في دماغه ويطلب قهوة سادة، الساعة اتناشر وعشر دقايق كان خلص اللحن وبيسجله (بصوا الساعة اللي ورا عشان تتأكدوا) ومكانش يعرف اني لما قولتله وهو ماشي الفجر عايزين نكررها قريب انها هتبقي قريب أوي كده”.