“حاجة 13 خالص”.. علي الطيب يكشف سبب انتقاده زملاءه بمسلسل “عمر أفندي”: الفنان أناني

علق الفنان علي الطيب عبر حسابه على موقع التواصل الاجتماعي “فيس بوك”  على  الجدل الذي أثير خلال الأيام الماضية بعد منشوره الذي انتقد فيه استخدام جملة “حاجة 13 خالص”، والتي قدمها بشخصية “البساطي” في مسلسل اهو دا اللي صار، و استخدمها بعد ذلك زملاؤه في مسلسل “عمر أفندي” والذي عُرض مؤخرًا ونال نجاحًا كبيرًا .

وكان سبب انتقاد علي الطيب أن زملاءه لم يشيروا إلي استعانتهم بهذه الجملة، التي قدمها خلال شخصية البساطي في مسلسل “أهو دا اللي صار”.

وكان صناع وأبطال مسلسل “عمر أفندي” يستخدمون هذه الجملة ضمن أحداث المسلسل.

وكتب علي الطيب: تم حذف البوست والأسباب هي أنني ممكن أكون عبرت بشكل يزعل زمايلي من اللي اتكتب، بس هما زعلوني بأنهم مذكروش في أي برنامج أو أي لقاء أنهم اقتبسوها من وديع البساطي في مسلسل “أهو ده اللي صار”.
وأضاف “المصطلح موجود في مصر زمان فعلًا مش انا اللي اخترعته، بس بيبقى كل ممثل بيبذل مجهود من أجل الشخصية عشان تبقى لحم ودم مش كلام على ورق فقط، وبيقول كلامه وخلاص”.
وده كان جزء من مجهودي اللي تم أثناء تحضير الشخصية في المسلسل، وبعد ما عرضت بعض المصطلحات على الأستاذ السيناريست عبدالرحيم كمال والأستاذ حاتم علي عليه رحمة الله، اختارنا اللي يتناسب مع الشخصية التي تعبّر عن شخصيته واتوظف في الحوار بشكل مناسب ومنطقي للمشاهد من الأستاذ عبدالرحيم واتعرض المسلسل، وربنا كتب لنا القبول في قلوبكم
ونجح المسلسل واتشهرت شخصية وديع البساطي بمصطلحاتها، اللي تعتبر كانت جديدة على الجمهور، رغم أن الجملة ليها أصل ومعنى ووضحناه في المسلسل.

وقال أيضًا ، “أظن احنا في مهنة واحدة يعني عارفين شغل بعض، ونعرف بعض كويس، و بينا كل خير لا يمكن يجيلي عمل فني أو اسكريبت وأكتشف أن في جملة أو مصطلح مشهور لزميل ليه ونجح بيه وأكرره أو أتجاهل مجهوده هو وصناع العمل واحترم نجاحه، وحق كل فنان يغير ويبقى نفسه يعمل شخصية حلوة ويستمتع بأدائها المشاهد، وده حق شرعي، بس أظن أن التميز هنا هيكون في الاختلاف والاجتهاد المطلوب منك، وليس الاستسهال.
ولنفرض حصل وقلت مصطلح يخص شخصية فنية لعبها زميل ومتفرجتش عليه أو مافيش حد نبهني، يبقى أقل واجب بعد عرض المسلسل وعرفت المعلومة يبقى أقل حق، سواء كتّاب العمل أو أنا كفنان أوضح في أي لقاء، في أي برنامج أنه تم الاقتباس من العمل الفني اللي قبلنا، ووقتها مش هيكون ليه حق ازعل وأفهمها تجاهل من زمايلي لأني غصب عني مفهمتهاش غير كده”.

وتابع قائلًا “واللي يعرفني كويس عارف إني دايمًا مبتأخرش عن زمايلي
وبفرح لنجاحهم من قلبي ولا عمري نفسنت ولا اتكلمت في تفاصيل شبه دي، بس الموضوع لو مكنش يخصني كنت هقول كلمة حق في حق الزميل اللي سبق ونجح بشخصية وبمصطلحاتها اللي علّمت مع الجمهور بفضل ربنا”.

وأكمل “وأهم من كل ده اكتشفت أن بعض الصحفيين هيحولوا الموضوع لمشكلة، وهيكبروا الموضوع بيني وبين حاتم وأبو سريع وآية، واحنا اللي بينا كل خير وصحاب واخواتي وعلى راسي، وربنا يعلم أنهم غاليين عندي بس حسيت اني مش شرط يكون زعلي من تجاهلهم يفرق معاهم.

فا محبتش أسيب الموضوع يكبر وتاخد اتجاه مش لطيف، وطلبت من الشباب المسؤولين عن الصفحة يحذفوا البوست، لأن العتاب والهزار هيقلب جد لحد ما اكتب بوست، أوضح فيه، وربنا ما يجيب زعل ولا مشاكل .
و على رأي البساطي
الفنان أناني ومش عيب”.