لبلبة لـ محمد عبد العزيز فى ندوة تكريمه: علمتنى الكوميديا والانضباط

حرصت الفنانة لبلبة على توجيه كلمة مؤثرة للمخرج الكبير محمد عبد العزيز خلال ندوة تكريمه ضمن فعاليات مهرجان القاهرة السينمائي الدولي، حيث عبّرت عن امتنانها العميق له، واصفة إياه بـ"أستاذها العظيم" وصاحب الفضل الكبير في مسيرتها الفنية، قائلة "ألف مبروك يا أستاذي يا عظيم، تستاهل تكريمات الدنيا كله".

لبلبة: ماجدة الخطيب كانت السبب في لقائي الأول بالمخرج محمد عبد العزيز
وتابعت: "ماجدة الخطيب كانت السبب في لقائي الأول بيه، جابتني مكتبها وقالت له دي هتبقى شادية الصغيرة، وقدمني في فيلم (في الصيف لازم نحب) وسط نخبة من العظماء، وخلاني أغني غنوة بحبها جدًا "لو نحب دا شيء طبيعي، واللي محبش يبقى مش طبيعي".

وأضافت: "بعد كده شُرفت بالشغل معاه، وكان بيعامل كل الأبطال بالحب والاهتمام، انبسطت في الشغل معاه لأنه كان منضبط جدًا، والمخرج كان يقولنا نلبس إيه، ولما يختار فستان واحد كنت أجيب ثلاثة! علّمني أستاذ محمد إزاي أقدّم الكوميديا".

وتابعت: "في فيلم (البعض يذهب للمأذون مرتين) قال لي: قولي الجملة عادي جدًا، مش كأنك بتعملي كوميدي، علّمني إن الضحك ييجي من الصدق، مش من المبالغة، ومن هنا الناس تضحك أو لا، المهم نقدم الشخصية مظبوطة".

واستكملت حديثها: "عمري ما أنسى إنه السبب في أول بطولة مطلقة ليا في فيلم (خلي بالك من جيرانك)، وجازف بيا ونجحنا الحمد لله، وعلّمني حاجات كتير زي إني ما أهز راسي في المشهد الكلوز، وإزاي أمشي على إيقاع الكوميديا الطبيعي، وأنا لحد دلوقتي ماشية على كلام أستاذي، ليك فضل كبير عليا، وألف مبروك لحضرتك".

قائمة الأفلام المشاركة في مهرجان القاهرة
وتضم القائمة الكاملة للأفلام المشاركة في الدورة الـ46 من مهرجان القاهرة التي تُقام في الفترة من 12 إلى 21 نوفمبر برنامج غني ومتنوع يضم حوالي 150 فيلمًا من مختلف أنحاء العالم، تتوزع على 11 مسابقة وبرنامجًا مختلفًا، مما يعد بتقديم تجربة سينمائية فريدة للجمهور والنقاد.

وجاء توزيعها كالتالي:
المسابقة الدولية: 14 فيلمًا.
القسم الرسمي خارج المسابقة: 15 فيلمًا.
مسابقة أسبوع النقاد: 8 أفلام.
مسابقة آفاق السينما العربية: 9 أفلام.
مسابقة الأفلام القصيرة: 24 فيلمًا.
برنامج العروض الخاصة: 18 فيلمًا.
البانوراما الدولية: 18 فيلمًا.
برنامج عروض منتصف الليل: 5 أفلام.
برنامج كلاسيكيات القاهرة: 12 فيلمًا.
برنامج الأفلام المصرية المرممة: 21 فيلمًا.
برنامج البانوراما المصرية خارج المسابقة: 6 أفلام.