تامر حسني يوجه رسالة مؤثرة لجمهوره بعد خضوع نجله آدم لعمليتين جراحيتين بسبب انفجار الزائدة

في رسالة مؤثرة نشرها عبر صفحته الرسمية على موقع "فيسبوك"، أعرب الفنان تامر حسني عن امتنانه العميق لكل من دعا وساند ابنه "آدم" خلال أزمته الصحية الأخيرة، التي استدعت خضوعه لعمليتين جراحيتين بعد انفجار مفاجئ في الزائدة الدودية.

وكتب حسني:
"أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني، اللي جاتلي منكم هنا، وعلى تليفوني، وتليفونات كل المحيطين بيا، هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس".

وحرص النجم المصري على توعية جمهوره بخطورة تجاهل بعض الأعراض البسيطة مثل الحمى، قائلاً:
"بقولكم كده عشان تبقوا حريصين مع نفسكم أكتر ولولادكم، مش كل سخونية تقولوا ده شوية برد وخلاص، لأ، روحوا اكشفوا كويس واعملوا سونار على البطن والزايدة مرة واتنين، عشان برضو ساعات مش بيبان، ولازم الدكتور يضغط بطريقة معيّنة عشان يعرف، لأن الزايدة خادعة..."

وأضاف حسني في رسالته المؤثرة:
"اطمنوا كذا مرة قبل لحظة انفجارها، عشان بجد مشاكل بتحصل بعدها كبيرة ومحزنة أوي، وحبيبي آدم عمل عمليتين صعبين أوي عليه، وبدعواتكم مستنيين النتايج تكون خير يا رب، ويعدي مرحلة الخطر. يارب، بحق (كن فيكون)، اشفيه وعافيه، هو وكل ولادنا".

وأشاد حسني بقوة تحمل ابنه، قائلاً:
"بس هو راجل وهيتحمل، وإن شاء الله ربنا يكرمه ويعافيه ويحفظه هو وإخواته، ويحفظ كل ولادكم يارب".

وختم الفنان رسالته بشكر خاص للجمهور على دعمهم، قائلاً: "وأحب أقول تاني شكراً من كل قلبي على دعواتكم. أنا شايف قلب كل حد فيكم وهو بيدعي بصدق. متشكر أوي يا جماعة، شكراً لكل اللي اهتم وسأل عن ابني ودعاله، هنا أو على التليفون، واللي طلعوله صدقات لشفائه من غير ما يعرفونا شخصياً. أنا مش لاقي كلام أشكركم بيه، وأنا برضو بدعيلكم، وبقول لكم مثلها وأضعاف أضعافها. وربنا يحفظكم ويحفظ أولادكم، قادر يا كريم".

يُذكر أن أسرة الفنان تامر حسني والفنانة المغربية بسمة بوسيل مرت بأزمة صحية مفاجئة خلال الأيام الماضية بعد إصابة نجلهما "آدم" بانفجار في الزائدة الدودية، الأمر الذي استدعى إجراء عمليتين جراحيتين طارئتين في أحد المستشفيات بمدينة 6 أكتوبر، وسط دعوات كثيرة من الجمهور وأصدقائهما في الوسط الفني.