خاص| منتج فيلم "أزرة": "القاهرة السينمائي مهرجان عريق.. ومبسوط بإنهم تمسكوا بالعمل"

تحدث المنتج علي العربي، عن مشاركة فيلمه اللبناني "أرزة" الذي يشارك ضمن مسابقة آفاق السينما العربية بمهرجان القاهرة السينمائي الدولي بدورته الـ 45.

وقال المنتج علي العربي في لقاء خاص مع "ترند ريل": "مهرجان القاهرة هو مهرجان عريق، ومهرجان اتعلمنا فيه سينما وبدأنا نطلع على السينما العالمية والعربية هنا من أول ما بدأنا نقدم سينما كصناع".

وعن مشاركة فيلمه في المهرجان، قال: "مبسوط جدا إن فيلم أرزة موجود هنا في المهرجان ومبسوط أكتر أنهم تمسكوا بالفيلم للسنة التانية على التوالي، ومتحمس أسمع رأي الجمهور، ومبسوط لتجربة فيلم صناعة مصرية لبنانية".

وعن كواليس تحضير الفيلم، قال : "لؤي ووسام الاتنين منتجين معانا في الفيلم وهما الكتاب ولو عرضوا عليا الاسكريبت، حبيته جدا، ولما كمان شوفت شغل المخرجة وثقت فيها جدا، ولما اتكلمنا عرفت قد إيه هيعملوا فيلم من قلبهم، الفيلم بيتكلم عن المرأة العربية بشكل فيه احترام، فاتحمسنا وقولنا يلا نجرب".

وتابع: "أي شخص عنيف ضد المرأه هو شخص ضعيف، ودايما الصوت العالي والضعيف يعني ضعف، ومعنى كده إن الست اللى قدامه أقوى منه بكتير".

ووجه رسالة للرجال، قائلا: “اتكسفوا على دمكم ما تزعلوش الستات دول أهم حاجة في الدنيا دول أمهاتنا واخواتنا وزوجاتنا، مضيفا: "أنا مراتي ولدت من 10 أيام، ومن تجربتي معاها فهمت أن الست أقوى من الراجل ملايين المرات وزاد احترامي لأمي وأختي لما شفت التجربة اللى بتمر بيها، فالستات ما ينفعش حد يزعلهم".

وعن جديده، قال: "عندي فيلم هندي من إخراجي، هينزل الأيام الجاية، هو تجربة عالمية أولى، بيحكي عن ولد بيهرب من أبوه بعد عزلة 10 سنين على جزيرة علشان يروح كأس العالم، وهو فيلم هندي بصناعة مصرية وإن شاء الله نقدم حاجة مشرفة".