هاني عادل عن فيلم أرزة: "شبه المجتمع اللبناني البسيط ومجتمعنا في المناطق الشعبية"
حرص الفنان هاني عادل، على دعم زوجته الفنانة اللبنانية دياموند بو عبود، خلال عرض فيلمها أرزة، في مهرجان القاهرة السينمائي الدولي بدورته الـ45، برئاسة الفنان حسين فهمي.
وتحدث الفنان هاني عادل عن أهل لبنان قائلا :" أهل لبنان دلوقتي همًا أهلي يعني أنا من زمان جدا بحب الأصول اللبنانية والموسيقى اللبنانية والفن اللبناني بشكل عام والفنانين اللبنانيين ناس مثقفين أوي وعندهم ذوق أوي ومجانين أوي وبيحبوا يعملوا حاجات مختلفة دائما ".
وتابع :"أنا أهلي بقوا في لبنان وعايز أقولهم قد إيه أنا فخور بيهم وكلكو ناس عندها عزيمة وقوة ومستحملين الوضع اللي انتو موجودين فيه وبتحايل عليهم طول الوقت إن هما يجو مصر زي ما اتحايلت على دياموند لسه جاية الأسبوع اللي فات والانفجارات كانت قريبة من البيت عندها بس هي مكانتش عايزة تيجي خالص بس كان بالنسبالي ماكنش ينفع إنها متجيش في وقت خطر زي ده".
و أضاف هاني عادل عن الفيلم :"موسيقى الفيلم شبه المجتمع اللبناني البسيط اللي هو شبه مجتمعتنا في المناطق الشعبية اللي احنا مبنشوفهوش كتير في المسلسلات اللبناني أو في الأفلام اللبنانية، شكلها الحاجات بتبقى شيك دائما، لأ ده فيلم من الشارع بجد بيتكلم عن ناس حقيقية بجد بمشاعرهم بقضاياهم، كان لازم تبقى شبهم هما برغم المعاناة برغم كل حاجة بيحبوا الحياة وبيحبوا الضحك".
وأردف هاني عادل عن زوجته “ أحب أقولها ألف مبروك هي واصلة لحتة حلوة جدا روحتي أوسكار وروحتي كان وجيتي مهرجان القاهرة بالذات في الدورة ديه اللي بتدعم فلسطين ولبنان اللي أنا فخور إني موجود فيها وهي كمان فخورة إنها موجودة فيها، عايز أقولها إنك لسة تستحقي أكتر بكتير".
"مهرجان القاهرة السينمائي الدولي "
مهرجان القاهرة السينمائي الدولي، هو أحد أعرق المهرجانات في العالم العربي وأفريقيا والأكثر انتظاما، ينفرد بكونه المهرجان الوحيد في المنطقة العربية والأفريقية المسجل ضمن الفئة A في الاتحاد الدولي للمنتجين بباريس "FIAPF".
وتقام الدورة الخامسة والأربعون من مهرجان القاهرة السينمائي الدولي في الفترة من 13 نوفمبر وحتى 22 من الشهر نفسه، وتشهد مشاركة باقة مميزة من الأفلام بكافة أقسام المهرجان، بالإضافة إلى العديد من الجلسات الحوارية والندوات والورش.
