إلهام شاهين لـ"ترند ريل": أحمد عز يستحق التكريم.. والافتتاح كان رائع ولازم ندعم مهرجان بلدنا"

تحدثت النجمة إلهام شاهين، عن رأيها في حفل افتتاح مهرجان القاهرة السينمائي بدورته الـ45، ورأيها في التكريمات هذا العام، كما أكدت على أهمية دعم الفنانين لمهرجان القاهرة السينمائي بشكل خاص والمهرجانات المصرية بشكل عام.

وقالت إلهام شاهين، في تصريح خاص لـ"ترند ريل": "سعدت جدا بحضوري حفل افتتاح مهرجان القاهرة السينمائي، والافتتاح كان أكثر من روعة.. وقولت لرئيس المهرجان حسين فهمي إن السنة دي من أجمل أجمل السنوات للمهرجان، حقيقي كان شئ جميل ومفاجأة إنه يتم إهداء الدورة لفلسطين خاصة في الظروف الصعبة دي، وده كان مناسب جدا جدا في التوقيت ده لأنه شيء إنساني، لأن كمان احنا بنقولهم إن احنا حاسين بيكم".

وأكدت إلهام شاهين، أن المهرجانات الفنية لها دور ثقافي كبير، قائلة: "المهرجانات مش بس للانبساط والفساتين والريد كاربت والحفلات لا بالعكس، مع التأكيد إننا لازم نظهر بشكل مشرف، لكن المهرجانات لها دور ثقافي والثقافة دي بتعبر عننا وعن هويتنا وعن ظروفنا.. والفن ده بيمثلنا لأننا بنعيش أحداث كل البشر فلازم نبقى حاسين بيهم، وبالتالي لما نعمل مهرجان ونعبر عن رأينا عن اللى بيحصل حوالينا أحسن ما نلغيه ونقعد مايبقاش لينا رأي".

وعن حفل الافتتاح قالت: " أولا الحفلة كانت بسيطة جدا وده كان شيء جميل، وعجبني جدا في البداية الفرقة الفلسطينية اللى تم افتتاح الحفل، خصوصا أنها كانت فرقة جاية مخصوص من غزة، وعجبني أيضا دخول حسين فهمي على المسرح بشكل غير تقليدي وغير متوقع في الحقيقة لأنه ما دخلش داخلة عادية ولا قدمته المذيعة.. وكان دخوله بظهوره في آخر الاستعراض وهو محتضن الفرقة وقايل كلمته عن دعمنا للقضية الفلسطينية وأهل فلسطين ولبنان واللي بيحصل حوالينا وإن احنا حاسين بيهم كانت كلمة رائعة.. وانتهت الحفلة بفيلم فلسطيني لمخرج كبير جدا رشيد مشهراوي، وده مخرج أفلامه بتلف العالم وأنا شوفتله معظم أفلامه".

إلهام شاهين: أعجبت بفيلم الافتتاح

وأعربت إلهام شاهين عن إعجابها بفيلم الافتتاح، قائلة": "فيلم الافتتاح أحلام عابرة كان فيلم رائع،  واستمتعنا مع المخرج وأبطاله اللي كانوا حاضرين بالفيلم وفرحنا بيهم جدا واحتفلنا بيهم في نهاية العرض الذي كان كامل العدد".

واستكملت، قائلة: "الصالة كانت مليئة بالمشاهدين، وأنا استغربت جدا، لأن ساعات كتير الصالة بتفضى وقت الفيلم، والناس معظمها تحضر الحفلة وتمشي، لكن لما النور نور بعد نهاية العرض، لقيت الصالة كاملة.. وعبرت عن ده لحسين فهمي وقولتله إن الناس أول مرة تقعد تشوف الفيلم كاملا.. والصالة كاملة على الآخر فكنت مبسوطة جدا من الجمهور، والفيلم أثر فينا بجد".

وعن حرصها الدائم، على دعم مهرجان القاهرة السينمائي، قالت إلهام شاهين: "بالتأكيد لازم ندعم مهرجان بلدنا، مهرجان بلدي يعني مهرجان مصر يعني هو الأهم وهو الأقدر، والسينما احنا مش ضيوف فيها احنا أصحابها، يعني احنا أصحاب الليلة مش معزومين فيها، وما ينفعش ما نكونش موجودين ولازم نكون داعمين لمهرجانات بلدنا ومتواجدين فيها لأن احنا زي ما قولت مش ضيوف ولا معزومين احنا أصحاب الليلة.. احنا أصحاب المهرجان".

رأيها في تكريم أحمد عز ويسري نصر الله 

وعن رأيها في التكريمات، قالت: "التكريمات كانت مستحقة، سواء تكريم أحمد عز فهو ممثل رائع بجد وكلمته في المهرجان كانت تلقائية وجميلة وحقيقي وصادق جدا، وعجبني أحمد عز لما قال اسم الجائزة لوحده جائزة لأنها باسم فاتن حمامة، وده حقيقي لأننا بنعتز بيها كنجمة كبيرة، وبالتأكيد أي فنان ياخد جائزة باسم فاتن حمامة فهو حقيقي تكريم مهم وجايزة كبيرة جدا..  وطبعا جائزة إنجاز العمر للمخرج يسري نصر الله يستحقها عن جدارة، فهو مخرج كبير، وفرحت بيهم، والاختيار كان رائع في كل شئ".