إسلام إبراهيم يكشف حقيقة وجود جزء ثاني من مسلسل "تيتا زوزو"

وقال إسلام إبراهيم عن حقيقة وجود جزء ثاني من مسلسل تيتا زوزو: "بنسبة 90 % هيبقى في جزء ثاني من مسلسل تيتا زوزو ، ولو السيناريو أقوى من الأول فا ليه لأ ولكن احنا لسة مأخدناش قرار رسمي في الموضوع ده هو لسة بياخدوا الآراء ويشوفوا إيه هيحصل".

وتابع خلال لقائه مع الإعلامية فاطمة مصطفى في برنامجها "الراديو بيضحك"، عن الجزء الثاني من أعلى نسبة مشاهدة: “ياسمين أحمد كامل المخرجة طلعت بفكرة مرعبة، لأن فعلا مصايب السوشيال ميديا مبتخلصش، واحنا كل يوم بنصحى على كارثة واللي معتقد أن ده السقف لأ مش السقف احنا لسه في أول دور، وكلنا قولنا فعلا ولو حصل كذا هتبقى جامدة جدًا، فجأة المؤلفة قالت والله أنا مش متحمسة، شركة الإنتاج كانت متحمسة، ياسمين كانت متحمسة جدا، احنا كممثلين كنا متحمسين جدا، لأن اللي قالته ياسمين هيودي الشخصيات كلها في حته تانية خالص حاجة مرعبة".

و أضاف : "وبعدين الموضوع نام شوية، نام بقى هيتعمل مش هيتعمل معرفش، وأنا متحمس جدا للفكرة اللي قالتها ياسمين ولو سمعاني دلوقتي بقولها لازم تعملي جزء ثاني، ومبسوط من نجاح المسلسل لأن الناس وعيها بقى كبير وبقت بتفهم وبتجري ورا الحاجة الحلوة بصرف النظر عن المسميات أو أسماء معينة، الناس بقت عايزة موضوع كويس، أحداث معمولة حلو، إخراج كويس، تمثيل كويس، وبقوا يحكموا على الحاجة بجودتها، وشافوا عمل جيد قدامهم وبقيت مبسوط أن الناس بقت بتفهم الممثل المجتهد من اللي مش مجتهد".

"إسلام إبراهيم يشيد بموهبة انتصار"

وأشاد الفنان إسلام إبراهيم بموهبة الفنانة انتصار وذلك بعد تعاونهم سويا في مسلسل أعلى نسبة مشاهدة، قائلا:"انتصار دي ممثلة محصلتش ولا هتحصل وبشوف أنها مش واخدة حقها، مين ممكن يعمل تراجيديا بالشكل ده والكوميديا بخفة الدم الرهيبة دي، المفروض تكون في حتة تانية خالص على مستوى موهبتها دي".

"آخر أعمال إسلام إبراهيم"

والجدير بالذكر، أن آخر أعمال إسلام إبراهيم،  مسلسل تيتا زوزو، ودارت أحداث المسلسل في إطار درامي اجتماعي حول الجدة الأرملة زوزو التي كانت تعمل بالزراعة، وهي أم لأربعة أبناء وجدة لسبعة أطفال وأحفادها يعتبرونها مثلهم الأعلى وحين يقعون في أي مشكلة يلجأون لها وتحاول دائمًا التقرب منهم وتحب ما يفعلونه وتحاول تعلمه، ولكن تقع دائمًا في خلاف مع أبنائها لأنهم يرونها تربي الأحفاد بطريقة لا تتناسب مع العصر الحالي وفي كل حلقة تحاول حل مشكلة لواحد من أحفادها ، بطولة إسعاد يونس إلى جانب كوكبة من النجوم أبرزهم: مصطفى غريب، إسلام إبراهيم، ندى موسى، محمد كيلاني، إيناس كامل، حمزة العيلي، نور محمود، محمود البزاوي، وإيمان يوسف، وآخرين من الفنانين، والعمل من تأليف محمد عبد العزيز وإخراج شيرين عادل.