أحمد عز: "كان نفسي والدي ووالدتي يشوفوني وأنا بتكرم.. وأهدي الجائزة للزعيم عادل إمام"

كرم مهرجان القاهرة السينمائي في دورته الـ45، النجم أحمد عز حيث تم منحه جائزة فاتن حمامة للتميز خلال حفل افتتاح الدورة الجديدة الليلة.

وألقى النجم أحمد عز، كلمة عقب تكريمه في حفل الافتتاح، تحدث خلالها موقف مر به منذ 24 عاما في بدايته، وعلاقته بالمهرجان، حيث قال: “من حوالي 24 سنة خيروني ما بين أكمل في شغلي أو إني أعمل بطولة أول فيلم وعلى غير رغبة أهلي اختارت إني أدخل مجال التمثيل وابتديت أصور، وفي نص التصوير جه وقت مهرجان القاهرة السينمائي وكان نفسي أحضر المهرجان وكان نفسي أكتر الدعوة تجيلي على البيت مكتوب عليها الفنان أحمد عز، مش لسبب غير إني أقول لوالدي ووالدتي إني اختارت صح وإني ماشي صح”.

واستكمل: “المهم الدعوة مجاتش فضلت مستني أسبوع، والأيام بتعدي لحد لما جه يوم المهرجان الصبح مفيش دعوة قمت واخد عربيتي وطالع على المهرجان وأنا زعلان جدا وطالع على إدارة المهرجان وقولتلهم إزاى الدعوة ما تجليش المهم إنهم كانوا في غاية الكرم معايا وادوني الدعوة.. ورجعت البيت وحضرت نفسي وكنت عايز أكون أبيض واحد على الريد كاربت من النضافة على أساس إني هتصور ووالدي ووالدتي اللي قاعدين في البيت هيشوفوني هيبقوا فخورين بيا".

وأضاف: "المهم دخلت على الريد كاربت وعملت إني مثقل بالفن جدا، عديت على أول كاميرا محدش عرفني وكذلك نايل سينما ونايل دراما والأسرة والطفل.. مفيش خالص قولت مش مشكلة".

وتابع: "كان نفسي أبقى قاعد في النص هنا في القاعة، علشان الكاميرا تيجي عليا فهما يشوفوني في البيت ويبقوا فخورين بيا، وأنا داخل من الباب لقيت الراجل الجميل بتاع الأمن، قالي حضرتك قاعد فوق الحقيقة قعدت فوق خالص".

واسترسل قائلا: "وبعدين روحت البيت وأنا مضايق جدا، والدتي دخلت عليا وقالتلي ربنا ينولك مرادك.. تلف الأيام وآجي أقف على خشبة دار الأوبرا العريقة وأتكرم وآخد جايزة اسم صاحبة الجائزة لوحده جائزة.. لأ ومين اللي بيكرمني كمان معالي وزير الثقافة، والنجم الأستاذ نجم النجوم اللي مجاش زيه الأستاذ حسين فهمي.. بس للأسف كل ده بيجي ووالدي ووالدتي مش موجودين بس أنا متأكد إنهم لو كانوا موجودين دلوقتي كانوا هيبقوا فخورين بيا".

وأكمل حديثه قائلا: "إني آخد الجائزة الكبيرة العظيمة دي، يعني مش اجتهاد مني لوحدي دي جائزة لكل واحد علمني حاجة كل مخرج ومخرجة كل زميل وزميلة كل عامل هو له الفضل، هما أصحاب فضل وجميلهم هيفضل على راسي، ولولاهم مكنتش هبقى هنا بس أنا بعتبر الجائزة العظيمة دي هي حافز للي جاي لأن أنا لحد النهاردة أنا حاسس إن أنا معملتش أي حاجة خالص أنا لسة ببدأ".

وكشف عن نصيحة الزعيم له، قائلا: "اسمحولي في النهاية الجائزة دي عايز أهديها لشخص نجم عزيز عليا وعزيز علينا كلنا وملهم بالنسبة ليا ولكل الناس تقريبا.. قالي في يوم من الأيام الإلتزام والورق هما وأبوك وأمك في الصناعة وأنا بدي النصيحة دي لأي حد جديد برضو يارب كل زمايلي يتكرموا.. وفي النهاية أهدي الجائزة دي للنجم الزعيم عادل إمام".