علي ربيع : "قعدت طول سنين الجامعة أمثل من حب الناس فيا مش من حبي للموضوع"

حل الفنان علي ربيع ضيفا على برنامج “فايق و رايق” مع الإعلامي إبراهيم فايق، المذاع عبر قناة "اليوتيوب"، وتحدث من خلاله عن بداته الفنية، وحياته الشخصية.

و تحدث علي ربيع عن بدايته قائلا: “أنا مكنتش عايز أمثل أبدا ولا ديه كانت حاجه جوايا، بس أنا كنت بقلد الناس كويس، وأقلد ممثلين، وصحابي اللي كانو شايفين دا، في واحد صحبي منهم كان بيغني و دخل كورال بتاع كلية تجارة، فعرف إن في مسرح هناك، قعد سنة يزن عليا لحد ما روحت المسرح”.

و تابع علي ربيع: “دخلت المكان وشفته، و قعدت عشان كان في تكييف جوا، مقعدتش عشان أمثل، ورئيس الفريق قالي تيجي بكرة الساعة 10 الصبح، ومكنتش عايز أروح، بس قومت رايح طلعت المسرح وعملو عليا دايرة ومش عارف هيقولولي إيه وكنت مكسوف جدا، وإيه اللي جابني هنا، و هما كانو ممثلين جامدين و رئيس الفريق كمان كان أوتاكا".

و أضاف علي ربيع :"قالي انت عايز تمثل قولتله لأ قالي أومال انت جاي ليه، قولتله مش انت اللي قولتي امبارح تعالى، كل دا بقا والناس بتضحك، قالي طب ما صحبك قالي إنك بتعرف تمثل، قولتله صحبي بقا اللي قالك مش أنا، هو شايف حاجة فيا والكاست كله شايفين حاجه أنا مش شايفها، الناس دي مبسوطة في إيه، فضل يجرجرني لحد ما عملتله مشهد". 

و أكمل: "وكان في ناس تانية جاية تختبر طلع واحد ورا واحد، في الآخر مشى كله وقالي انت معانا في الفريق، وكملت في المسرح وأخدتها من تحت خالص لحد ما اخدت أحسن ممثل في جامعات مصر في المسرح ".

و أردف : “قعدت طول سنين الجامعة أمثل من حب الناس فيا مش من حبي للموضوع، من رد الفعل، وأنا بمثل لحد دلوقتي عشان رد الفعل، لو جيت لحظة لقيت الناس مش مبسوطة مش همثل تاني، ديه حاجة أنا واخدها جوايا قرار يعني هعمله هعمله، لأن أنا مثلت عشان الناس كانت فرحانه و بتسقفلي، مش عشان أنا شايف نفسي”.