نهى عابدين: "بركز إني مكررش نفسي ولما بعمل دور يعمل ضجة بيحصروني فبضطر أقعد فترة"

حلت الفنانة نهى عابدين ضيفا علي برنامج "معكم"، الذي تقدمه الإعلامية منى الشاذلي، المذاع على قناة “ON”، وتحدثت من خلاله عن بدايتها الفنية، وأسرار عن حياتها الشخصية. 

تحدثت نهى عابدين عن بدايتها الفنية قائلا: "اشتغلت في ونوس وأنا لسه في المعهد وكنت مخلفة ابني عنده شهور، أنا طول الوقت عايزه أعمل كل حاجة مع بعض عايزة أدرس وعايزة أشتغل وعايزه أتجوز وأخلف بدري".

و أكملت نهى عابدين عن مسلسل “الكابوس": “كان حواليا ناس عندهم خبرة كبيرة وممثلين كبار ومواهب جبارة، وطبعا كنت خايفة ومتحمسة إني عايزة أبقا في نفس المستوي ده، مساحتي كا تمثيل كانت كبيرة وفي مشاهد مهمة فكان لازم أبقا مذاكرة”.

وأضافت عن اختلاف أدوارها: “أنا أكتر حاجه ببقا مركزة فيها إني مكررش نفسي طول الوقت وعندي خوف من إني أكرر نفسي أو أعمل حاجه شبه حاجة”.

وتابعت: “لما الواحد بيعمل دور وبينجح بتلاقي طول الوقت بعدها بيتقدم نفس الأدوار، أنا بقا لا مش هتحصروني في نفس الدور ده أنا عايزه أعمل حاجه تانية مختلفة، فتلاقيني دايما بعتذر ومش متواجدة بشكل كافي لأني حريصة إني أنقي الدور، دي من الحاجات المهمة بالنسبالي”. 

و أردفت :"ميهمنيش الحاجات الكتير يهمني الحاجات القليلة المهمة".

“مسلسل تحت الوصايا ” 

وتحدثت عن مسلسل تحت الوصايا قائلة : “المسلسل دا بعتز بيه جدا وبحبه أوي كمسلسل مش بس كممثلة، الشخصيات حقيقية أوي أوي جواهم صراعات خير وشر”.

وتابعت عن أكثر الشخصيات تشبهها: “أنا بركز أوي مع الشخصية اللي بعملها وبذاكرها، وكل شخصية فيها حاجة مني مش لازم شخصيتي بس فيها حاجة أي حاجة مني، معرفش لو اتربيت تربيتهم و اتعرضت للمواقف اللي هما اتعرضولها هبقا زيهم ولالا، مش فكره إني أقول أنا مش ديه ولا مش ديه”. 

"أخر أعمال نهى عابدين"

ومن الجدير بالذكر أن أخر أعمال نهى عابدين مسلسل مفترق طرق الذي يعرض حاليًا عبر منصة شاهد الإلكترونية، وتدور أحداثه حيث تجد أميرة نفسها في مفترق الطرق؛ بعد القبض على زوجها المحافظ عمر في قضايا مخلة بالشرف، فتقرر العودة إلى مهنة المحاماة، حتى تتمكن من إعالة أسرتها، ويساندها صديقها القديم المحامي يحيى، ويشارك في بطولة المسلسل عدد كبير من النجوم والنجمات، منهم: هند صبري، إياد نصار، ماجد المصري، علي الطيب، جومانا مراد، هدى المفتي، وغيرهم، والمسلسل من تأليف شريف بدر الدين، و وائل حمدي، و إخراج أحمد خالد موسى.