خاص.. إنجي الإنجباوي: "مبتأخرش عن أي حدث لتكريم المرأة وطليقي أكتر شخص شجعني"

أكدت البلوجر إنجي الإنجباوي، أنها تحرص دائما على حضور كافة الفاعليات التي تدعم المرأة، كاشفة عن سر محافظتها على رشاقتها وجمالها دون أن تلجأ إلى عمليات لفقد الوزن، في ظل اتجاه الكثيرون إلى عمليات إنقاص الوزن.

وقالت إنجي الإنجباوي خلال لقائها بموقع "ترند ريل": "مش بتأخر على أي فاعلية ليها علاقة بتكريم المرأة"، معربة عن سعادتها بمشاركتها في جيرلز سبيس، لكونها من أهم وأكبر المنصات التي تدعم المرأة في كافة المجالات.

وكشفت إنجي الإنجباوي، عن بداياتها في مجال الموضة، قائلة: "شغفي بالموضة والأزياء ابتدى من وأنا صغيرة جدا، وأهلي وطليقي من أكتر الناس اللي شجعوني جدا،  في حين أن الناس كتير انتقدتني ومكنوش فاهمين شغلي أوي، ولكن مكنش بيفرق معايا حاجة مادام أنا بعمل اللي بحبه".

سر رشاقة إنجي الإنجباوي

أما عن سر رشاقتها، قالت إنجي الإنجباوي: "أنا باكل كتير عادي ومبحرمش نفسي من حاجة بس بظبط الوقت بتاع أكلي، يعني ممكن في يوم واحد أكل سمك وشاورما وحلويات وأيس كريم، لكن اليوم ده بفضل قصاده أسبوع ماكلش".

وأردفت إنجي الإنجباوي: "بهتم دايما بالرياضة والتمرينات، ولكن نظامي في المحافظة على الوزن بيعتمد على 70 % أكل، و30% رياضة".

كما تحدثت عن كيفية الموازنة بين تربية ابنتها وعملها، حيث قالت إنجي الإنجباوي: "وجود بنتي في حياتي أحلى حاجة في الدنيا، برغم احساسي أغلب الوقت إني مقصرة، لأن من وجهة نظري أن الطفل في مراحله الأولى بيحتاج مامته تكون موجودة معاه، أيا كان ظروف عمل والدته، وللأسف أنا معنديش الوقت الكافي عشان أخد بالي منها طول الوقت وفيه أوقات كتيرة مبقدرش أروح معها التمرين".

واختتمت إنجي الإنجباوي: "ورغم كدة أنا عمري أبدا ما أفكر أني أبعد عن كل ده عشان أخلي بالي من بنتي وبس، لسبب بسيط جدا وهو إني في وقت من الأوقات هعجز وطبعا مقدرش أطالبها وقتها أنها تسيب حياتها وتراعيني ويكون مقدرة ظروف حياتها".